Adrar n Lkst

Adrar n Lkst nɣ Afa n tmzgadiwin iga yan udrar illan ɣ tsga n Sus-Massa, irwas izd nttat ad igan ixf n idrarn n Sus s yat tiɣzi tlkmd 2357 m. Adrar ad yuckad ɣ gr idwarn n Ammln n Tfrawt d idwarn n Ayt Ṣwab. Ittuysan bahra s agayyu n ugrzam acku iɣ tt tẓrit ɣ azal ɣ tasga n Tfrawt ar ak gis itbayyan yan ugrzam zun d is gis ittuynḥat. Adrar ad dars yan umzruy imqqurn mac idrus mad fllas nnsn ɣ ussan ad.

Adrar n Lkst

Lkst d igizuln

Ur imkn ad isawl kra n umara f ugdud n igizuln bla ad ibdr udrar n Lkst lli igan tamazirt nnsn ɣ mad izrin. Ɣid kra n id bumzruy isawln f tamazirt n Igizuln d ma fllas nnan:

1. Ibn Saɛid (1214) inna masd asif n Sus, asif n Massa d tin Nun, kkan-d kullu idrarn n Lmṭa d umutti nns, win igizuln. Ur iẓḍar ay’g abla idrarn n Waṭlas Mẓẓiyn.
2. Marrakci (1224) isawl-d f tamazirt n Igizuln nna d igan Al Kosta tamaẓunt nns, amma tin Lmṭa tga tt Nul Lmṭa (tasna. 309). Nul lmṭa tga tt tamdint n wasif n Nun lli tn ikkan ɣ-akud-ann iga s yism Tagawst, d Ksabi.
3. Baydaq isawl-d f igizuln n udrar n Lkst nna ɣ nufa Al Kosta nna f isawl Marrakci d nna s nufa att nzdi d xtanna s tirxi. Iga yism n ugzzum anammas n Waṭlas Mẓẓiyn nna ɣ illa afa n tmzgadiwin (izig n Lkst), gr ayt Wactukn ɣ ugafa d ayt Ammln ɣ iffus. Tamdint n “ Lkst “ n Baydaq d “ Al Kosta “ n Mrrakci ẓḍarn ad ilin ɣ tmnaḍin n udrar ad
4. Leon Afriqi (tasna. 7) inna masd Gizula ay’gan tagzzumt tamiridyonit n Sus Al Aqṣa. Gizula iga tt yism n idrarn nna izrayn ɣ tsga y’ad.
5. Ɣ tamggarut, arra n Hawdigi (tasut tis-XVIII) ibdr kra n ismawn nna ɣ nufa wassaɣ n Al Jazuli Al Lakusi nna d iskarn lqqnḍṛt gr imaratn n tasut tis-XVI d ism nns n ɣilad: Adrar n Lkst d Waṭlas Mẓẓiyn anammas.