Ḥmad Ddɣrni: Amzaray ngr tunɣilin

Ɣ isggʷasn n 70, issnta taɣarast tazzulant amzun d umstan ɣ [[Sidi Sliman]] , dffir nns immutti s [[Rrbaṭ]].

Ilul Ḥmad Adɣirni ɣ usggʷas n 1947 ɣ usun n taddart nna iwalan i tqqbilt n Ayt Ɛli ɣ [[Ayt Baɛmran|Ayt Baɛmṛan]], ikka tt inn babas iga aslmad ɣ tinml n Zzawit n taddart d umstan, iga u [[usun]] n igʷrar n Sidi Ɛbdṛḥman ɣ tnila n [[Tiznit]], tagrawt n uglu iɣra n Dɣirni asslmd nns amnzu ɣ udɣar n tlalit nns, ismd taɣuri nns ɣ usinag n tznit aylliɣ immatti s win trudant, yumẓ tugga n lbak ɣ usinag n Bn Tacfin ɣ [[Mrrakc]], dffir n mayann immatti s tmdint n [[Fas]] lliɣ yumẓ turagt tasdawant ɣ tskla, issḍfṛ as yat turagt yaḍnin ɣ uslgn ɣ tsdawit n muḥmmad wiss smmus ɣ tɣrmt n ṛṛbaṭ, aylliɣ iswwuri amzun d umstan ɣ ṛṛbaṭ nit, zɣ usnti n ssbɛinat iga agmam ɣ twwuri tasrtant zɣ imẓiy nns ig ula agmam anmmassu ɣ tamunt n imzrawn n [[Lmɣrib]] iga igllin n Ḥmad adɣirni zɣ imqrann n umussu amaiɣ d umɣar n imaziɣn akkʷ,yiws ɣ tinawin timzwura n tsdawit n unbdu ɣ ugadir, ig awd anmmassu ɣ tmagrawt tamaynut, ig zɣ inbdadn nna biddnin i uskkir n ukungṛi amaḍlan amaziɣ ,d umzday n usqqim anamur n izrfan n ufgan ɣ fyinna asggʷas n 1993,ig uwnni ann yan usrag n usussn n tmntilt tamaziɣt ɣ uswir amaḍlan, ig anbdad nna iskrn taswingmt n ukabaṛ adimuqṛati amaziɣ amaɣribi ɣ usggʷas n 2005 Ḥmad adɣirni ifld tugtt n warratn ɣ igr n tskla d umzruy d tsrtit ula asgd nna izdin d tmaziɣt,iskr awd taɣmmist n « amzday » d « tamaziɣt », ittussan mass adɣirni dar imaziɣn akkʷ is ar bdda inzzɣ f izrfan n imaziɣn ɣ mad iẓlin s tutlayt d usgd d tɣnsa s umata d inkraf isrtann kra gan.<ref>Amadalamazigh Press - Nuwanbir 2020/2970. Uṭṭun 238. [https://amadalamazigh.press.ma/archivesPDF/238.pdf <nowiki>[Ɣr ɣ wantirnit]</nowiki>]</ref>