Aspinuṣuṛ
Aspinuṣuṛ iga yan wanaw n iḍinuẓuṛn iddrn ɣ iẓẓlmd n tfṛiqt kra n 95 ugndid (amlyun) n usggʷas, amassan Arnset stṛumṛ zzɣ tasdawit n ludfiɣ maksimilyan ɣ myunix yufa ɣ umzwaru n tasut tiss simraw (20) aḍinuẓuṛ ad ɣ taɣliwin¹ n yill ɣ tagut n miṣṛ d iga yas assaɣ n aspinuṣuṛ amiṣri, d iska² ɣ usggʷas n 1944 yan usalay³ ɣ myunix ifsr gis ixsan n uḍinuẓuṛ ad macc ixʷla usalay ad s yat tsnfrt ɣ imnɣi amaḍlan wiss sin, d ɣaman ɣar tiwlafin d tamawin⁴ ittyuran f aspinuṣuṛ.
| Aspinuṣuṛ | |
|---|---|
 | |
| Tasnsartut | |
| Tagldit | Animalia |
| Tazuni | Chordata |
| Asmil | Reptilia |
| Anmala | Saurischia |
| Tawja | Spinosauridae |
| Ddu-tawja | Spinosaurinae |
| Anaw | Spinosaurus Stromer, 1915
|
| Umlan imatayn | |
| Tiɣzi | 14 m |
Ffir n 100 n usggʷas ra ddaɣ ttyufan ixsan nns macc tikklit ad ɣ umṛṛuk s ufus n yat trabbut n imrzun (isnabbucn) s tnara n umassan niẓaṛ ibṛahim, d dissn umassan samir zzhri zzɣ tasddawit n lḥsn wiss sin. G umṛṛuk ttyufan igaluzn⁵ n tɣssa⁶ ns ɣ tggayin n ukal aẓggʷaɣ ɣ tmnaḍin narfud, ɣilli iɣ yadlli llan isaffn ɣ tizi yan. Ma igan abida⁷ ɣ uḍinuẓuṛ ad mas yadlli iẓḍaṛ a ikcm s umaḍal n waman d a igʷmmr islman d imudar n waman i yadlli illan ɣ isaffn ann, d iṭṭaf yan ucṭṭab ar ilkkm ar 6 n id mitru nttan as a yadlli ittcucf ɣ waman (zund aɣucaf), d nttan a igan aḍinuẓuṛ amsksum i kullu imqqurn lli nssn ar ɣil ad.