Aswami

Aswami nɣd afltas nɣd uḍu iga yan wanaw n tahriwin zzɣ tarabbut n ilgʷmaḍn istcin, d tahera n Uswami iɣ tessyafa imizi ar-tsmussu iɣzdisn n umggṛḍ nns dffir nns ar-d ttnunnet yat tagʷlimt afad ad inunnet ufltas ad mas imqqur uggar n uncek lli ila. Algʷmaḍ n uswami dars snat tiɣarasin iɣ ira ad iswwuri s ustci nns, kra gisn ar ittqqes d ar ittbbi ungis nns s iɣban nns istcin illan ɣ tzzwart n ugjay n uflla, d kra n ifltasn yaḍni smmdn f mayan mas iẓḍar ad ittnzaɣ astci nns ɣ walln n ungis nns nɣd wanna flaas igan imizi, anaw ad iɣban nns ṭṭafen yat tewila ar as takka ad yeẓḍar ad inzaɣ astci nns iɣ isiwrri agayyu nns s ḍarat, d wanawn-ad iẓḍaṛn ad nzɣn astci nnsn gantn: sin wanawn n uḍu iddrn ɣ Tafṛiqt, d yan wanaw iddrn ɣ agmmuḍ n Lhnd, d ur a yeskar walu i wefgan abla iɣ ikcm s walln nns, d ar tn bahra izwiẓẓi, d iẓdaṛ ad akkʷ ibukḍ iɣ ur tn-t issird dɣya, d iẓḍaṛ ad akkʷ ilkm tamtant iɣ zrin kra n tsragin urta issird alln nns. Ar tlkkm tiɣzi n ufltas ahindi kra n sin id mitru, d akʷlu nns iga aqhwi ijhdn, d ḍaṛat n ugayyu nns tlla gis yat tmatart trwas tismaqqalin. Ar cettan iswamen kigan n imudar zund igʷra d islman d igḍaḍ d kigan n wanawn n imsṭṭḍn imẓẓin zund iɣrdayn ... Iga wekṛḍmmuc yan unṭlib imizin n uswami, acku s udraf nns d tixntalin nns ar ittanef i tebbayt n uswami ar kiɣ t issṛmi yakʷi fllas iccet. ar ittddr uswami nɣd uḍu nɣd afltas ɣ Tafṛiqt d iffus n Asya, d tegzirin tigʷmḍanin n Lhnd d ula tigzirin n Lfilipin, amma tahra n uswami agllid ad igan anaw i kullu imqquṛn ɣ uswami ɣ umḍal kullu t, d ar ttddr ɣ iffus agʷmḍan n Asya, d tega ula anaw i kullu imqquṛn ɣ ilgʷmaḍn istcin, d ar tlkkm tiɣzi nns 5 n id mitru.