Lḥusayn u Ḥmmu asakni
Iɣ illa ɣ imariren n uhêwac, ɣ tizi lliɣ tekcem Fransa s tmazirt terzêm iginanen n waman s umuddu d uzwag,, wid sul iɣaman ɣ usayes asin azâzu n umarg d tmasayt n usayes ayelliɣ mmuten zun d Bn Zida, Baxcin, Buznnir…, llan wid iwin ingiten n tudert tamaynut ɣlin d "lɣerb", neɣ akw ukin i "tillas n igenwan" ddun s tmizar en yaggugen zun d Tayyeb u ali azeddu, Lhusayn u Hêmu Asakni, d wiyyâd… Imariren ad ur gin zun d rrwayes mu tega tɣarast llis ttiriren imis mas nit tenmugguen timukrisin n uzwag d tudert an yâden; lliɣ nit ilul wanaw ad n umarg ɣ uswir n uzwag d tudert n imezwagen. Ur ufin, iɣ zdârɣ ad iniɣ awal ad, ad didsen asin asayes d id bab n usayes
Lhusayn Asakni, yega yan ɣ imariren iwin idâgen n tudert ad ifel asyas d ayt usays iɣli d lɣerb. Ilul ɣ Warɣen ɣ useggwas n 1934. Yega zwar amarir n usayes urta iddi s tgemmi tumlilt. Lliɣ gis izzri yan imik izri ilemma izdeɣ ɣ Bercid. Mqqar ifel asays, ur t ittu umarg. Izdi ids sul tammara nnes d tadêfi s kigan d tɣarasin. Ur d ɣas iɣ d iwerri s tmazirt, maca ɣ temdint an nit ɣ illa. Gh tɣarasin ad llant tebratin, ur d tibratin n ineɣmisen, maca tin umarg. Ar tent snifilen imariren geratsen. Ilin daɣ inmuqqaren d imariren f ur isker ɣ kra n tsukt, neɣ ɣ kra n imensi, neɣ ɣ man yâden, tilli tɣarast llis izdâren ad t yâz i rrwayes, neɣ akw i tarmit lli isat Mohammed Mostawi ɣ umarg amaziɣ amaynu: tayffart ur ittun asays.
Tabrat n umarg ssnfl
Gh tebratin lli yuzen Lhusayn Asakni, had yat lli ittyazanen i umarir àetman u belàid isawel gis f maɣ ayelliɣ ifel asyas iɣli d lɣerb:
- Itti ɣ ihêwacen lemàict ur awent usin
- mlad is gis lexlêd nekweni as sers ihûrran
- xemsa u rebàin ad isen àemrɣ afus
- ar lssaɣ tajlabiyt ula acerqawiy
- gabelɣ tameɣra d uhêwac inna ɣ llan
- ɣ yîd nawwuz azal yawey iyyi wasif
- ur issin sɣix iberdan ula lmlakat
- lliɣ yi tbayen trêzi nnes ar tthâwalent
- salaɣ ilmma lemàict inu s ufus nneɣ.
Γemkli daɣ irur f yat tebrat n umarir Buslam s turart ad:
- tabrat nɣwit nɣêr a tent nssen ma gis
- ar tent ukkan aqraɣ ar k nettmnid
- mqqar en taggugt làaql iɣwi kid
- ay k a sidi buslam nefk lwijab
- ig ik rebbi d ufhim iɣ diwen jemàaɣ
- ad ur tegim asɣar ismussu wadû
- adû nnad ukan illan s akw irâz
- imma dwa n tmadûnt igan tin leqlb
- yan akw igan leɣcim ur at isiggil
- nekki tekka ɣ ixsan nneɣ xir llah
- nesrmi kullu iàamiyen ula ttêlba
- wanna f smumiɣ s inna nega nit uggar
- mlad is illa usafar ɣ lkutub
- a sar ukan nesker gisen ajllabiy
- yan usafar a telit a ddunit ad
- yan mi tella latêmuà imel lqenà.
Inmuqqarn ssnfl
Iɣ nmaggaren imariren, idrus maɣ ur tenmugguren s umarg. Yan wass, ur akw fellas skren, inmaqqar Lhusayn Asakni d undâm azeddu Lhacmi, sniflen iwaliwen ad:
- Asakni:
mdden yan ɣ ik iffuɣ izêri mas ittanay kullu laxbar lemdint ur a ten ttawin mqqar ukan ttidun ɣ lqasariyat
- Lhacmi:
lhêmdu lillah nesfawt ar aman kuz rrma neɣ uggar wanna ten yurun ad akw ur ittemnid acku isker tiyyâd.
Tiyffarin ssnfl
Taɣarst yâden yega t ad isker kra n tayfart ur igin tamrarut f kra n wawal yâden, ar gis ittemnid ixef nnes, ar isawal f warramen nnes. Had yat ɣ teyffarin n Asakni:
- Ggawerx yan uzemz ixef nnex as nsawal
- Ar nesaqsa ils ad ax kullu mlen lhêr
- Ula tadêfi netta ad ad a ten yakkan i wul
- Ayenna ruran iga ɣ willi hêrranin
- Illa gi lhêr kûz ar smmus aɣ llan
- Alili, tikiwt neɣ nzêra malik lmut
- Neɣ ahêbib d tejmàat yawi ten wayyâd
- Neɣ aglif iɣ idda kra kksen gisen tamment
- Flen asɣar tgabelt keyyi tiri tent
- Ma ssul innran ɣid lhêr ur akw llin
- Msmun awal n SGSM : Msmun awal amatay asnmalay n tmaziɣt (MMSM)