Vasilisa Tafalkayt

Vasilisa Tafalkayt (s tarusit: Василиса Прекрасная, Vassilissa Prekrasnaïa[1]) tga yat tnfust tarusit ifulkin, tettawssan bahra. Yura tt Aliksandr Afanasif ɣ udlis nns Tinfusin timadnaninn tirusiyin, Ddu uṭṭun wis 59. Isuɣl tt umara mqqurn Muḥmmad Akunad s tclḥit.

Adlis n Vasilisa

Asuɣl n tnfust ssnfl

Zikk lli nn bahra yaggugn, ad tt inn ikka iddr yan urgaz igan awssar, nttan d tmɣart d illi tssn lli mu ssaɣn Vasilisa tafalkayt.

Tumrt d tadawit as ddrn ɣ yat tgmmi mẓẓiyn n ukccuḍ lli iṭṭfn, mac tfta asn tudrtan immimn ass lli d iḍr yan waṭṭan yamẓ tamɣart lli. Ass lli tssn is rad sul ur tnkr ɣ waṭṭan ann, tssn is tt taẓ tmttant nns, tɣrad i illis tfk as yat tlulluct, tini as: "Ḥddu darm aylli talulluct ad as tt ur tmlt i mqqar d yan. Akud nna tllit ɣ kra n tassast. Fk as ard tcc tsutrt tt ad zun d taws ard gis tffaɣt. ha nn rad zun d taws.) Tamẓ ilmma tmɣart lli illis tssudm tt, ur tkki amya tmmt.

Yalla uwssar lli f tmɣart nns aylliɣ ftant ad bukḍnt walln nns. Mac ɣ tgira yiwl yat tmṭṭut yaḍnin. Iɣal iglin is rad tg i illis zun d innas lli imuttn.

Mac uhuy! Ur tgi xttad amr yat tuqjirt d txccant n tmɣarin. Tamṭṭut tiwi d dids snat tfrxin lli mu ggutn ibjggitn mac nttat gant dars zun d alln nns. ɣ tɣzi n wass ar tnt hlli tettḥllil. Mac tzrẓag tudrti Vasilisa tgllint. S kraḍt itsnt ar ttẓẓint Vasilisa. Ar tt kkatnt. Ssrmint tt s twuriwin. Ran tt ad tmdu d wad as tjdr tafukt d waḍu afalkay lli dars illan. ɣ tɣzi n uzal, ur ar tssflid ɣ tgmmi amr i ɣmkad : « Vasilisa », azzl ad tskrt tirmt ! « Vasilisa » azzl sɣus tigmmi ! ddu awi d ikccḍn zɣ tagant, ẓẓig tisitan. Azzl uggar n ɣmkad lli s ttazzalt.

« Vasilisa » ar akkʷ tskar tiwuriwin. Ar ttmaɣ ad tskr s wawal n kraygat yat gisnt. Ar bdda tsmdu tawuri nns.

Tmqqur d « Vasilisa » ifk as ṛbbi yan wafulki iggutn. Yan wafulki ur ilin anaw. Ur iẓḍar mqqar d yan ad fllas isawl ula ad t yara.

Taluluct lli as d tfl innas. Ur ar tt tettadja i tmmara, ar as taws. Ar d tnkkr « Vasilisa » zik, ur t ad tuggi tafukt tftu tẓẓig tisitan, tasi imik n ukʷfay, tkcm s yat talɣunst, tfk akʷfay lli i tluluct nns tini as: Taluluct inu, taluluct inu ssfld iyi ad zun d iniɣ mad igan tamukrist inu. Taluluct lli ar tssa akʷfay tkks « Vasilisa » ɣ tmmara lliɣ tlla. Ar as tskar tiwuriwin akkʷ.

Mad ilmma tskar « Vasilisa »? ar tettgawar ɣ tafukt n tylgi, tawi tt ar tsmuna kra n ijddign, ar gisn tskar tawckint. ɣ tizi yan nit taluluct nttat tsusi turtit, tugm d aman, tsrɣa takat, tsswa acuflur. Taluluct, ur d is hli tuws i « Vasilisa » ɣ twuriwin nns, is as akkʷ tmla yat tmɣit lli rad as yaj afulki nns ar hlli ittbuɣlu. Mayan ad isrgn i « Vasilisa » kra s tettimɣur ar as ittigut wafulki. Yan wass, argaz idda s yan umuddu bahra iɣzzifn. Tamɣart d istis umẓnt ɣilli irɣan ɣ tgmmi. Bṛṛa idl s tillas, anẓaṛ ar d iṭṭar, iḍagn ar sɛyiḍn.

Ussan imggura ɣ umwan ayan. tigmmi lli tssutl as d yat tagant. ɣ wasa n tagant ann tzdɣ yat taɣʷẓnt lli mi ssaɣn « baba yaga », iga dars ufgan iɣ rad tcc zun d iɣ rad tcc kra n ufulus.

Tamɣart tbḍa tawuri f istis : yat sgisnt ad tggʷa taḍrsa i yat tmlsit. Tis snat ad tgnu. Tnna i « Vasilisa » ar tṣṭṭat kmmi. Tssns asid ɣ tgmmi. Ur tfil yan ugzzum n wasid lli issntan ar ittbraqay imik ins ilmma.

 
Vasilisa Tafalkayt

Ma rad ittuskar? Inint tfrxin n tmɣart n babas n « Vasilisa ». Ur tlli takat ɣ unwal, ur tzḍar mqqar d yat ad tili tawwuri, iqqan mad ifttun ad d yawi takat zɣ tgmmi n taɣʷẓnt « baba yaga ». Tsawl d txfdit n tfrxin lli tnna (nkki ur ad ftuɣ, imsmarn n tḍrsa udan iyyi, sfawɣ sisn).

(ɣmkann d nkki ur ad ftuɣ udant iyyi tasmiwin inu sfawɣ sisnt) itn tis snat n tfrxin. S yat tklit sawlnt d tfrxin lli s snat itsnt nnant : (« Vasilisa » ar ad ax d yawi takat dar « baba yaga » taɣʷẓnt). Ur ta fllasnt trur « Vasilisa » awal lliɣ t usint luḥn tt id bra n tflut.

Tga tizi iḍ iqqnn. ɣ tuẓẓumt n tagant iḍaggʷn ar ka shuffutn. « Vasilisa » tksuḍ. Tssnta ar talla imil s iɣ d tkʷti taluluct lli nn tḥḍa ɣ wagws nns tini as : (Taluluct inu, taluluct inu ; han tamɣart n baba d istis uznnt iyi ad asnt d awiɣ takat dar « baba yaga » taɣʷẓnt lli icctan afgan (ad ur tiksaḍt, itn as tluluct, skud lliɣ dim ur tksuḍt amya). (tanmirt nnm a taluluct. Trurt iyi d tadusi) itn as « Vasilisa » tddm nit tamẓ abrid n tgmmi n « baba yaga ». Tagant tqqn s waddagn, mqqard yan itri ur ad ittaggʷa zɣ ignna, ayyur ingḍ ɣ imḍla.

Ar tfttu « Vasilisa » ar tettrgigiy, tḥnnẓ nn taluluct lli d nig ul nns, imik ilkm d yan umnay s tazzla, yan umnay iga akkʷ umlil. Tarikt tumlilt, izri ukan ur ikki itri n wass amya ibbaqqi d. « Vasilisa » tdda s dat nns, timqqa n udfl ar d ṭṭarnt f tawnudt nns, tifassin nns krmnt s usmmiḍ.

Ur tkki amya s iɣ d nit daɣ ilkm yan umnay yaḍn. Wad iga akkʷ azggʷaɣ. Ayyis nns azggʷaɣ. Tarikt tazggʷaɣt. Imun d nit d tafukt lli iskrn tiglgaḍ i « Vasilisa » ifk as imik n trɣi tzzu as timqqa n udfl lli illan f tawnudt nns. Ass s timmad nns ar tfttu « Vasilisa », lliɣ taẓ tadggʷat tlkm-nn yat tmamat lli ɣ tlla yat tgmmi n ukccuḍ issutl as d yan uḍrras ittuskar ɣas zɣ yixsan n ufgan. Ɣ uflla, ttrsn iqlquln n ufgan. Tiflut tettuskar sɣ yixsan n taɣmiwin. Isrgln nns ɣ win iḍuḍan d tfdnin, iẓkrunn ɣ wagjiwn s wuxsan nnsn ifrsn. Lliɣ tẓra « vasilisa » aylli, tggʷd, tkrm, tgummi sul ad tmussu, zun d iɣ tzdi d wakal. Akud ann nit ad daɣ ilkm yan umnay yaḍnin iḍlan, ayyis nns iḍla, tarigt tḍla, yuki aḍrras lli illan ɣ dat nns laḥ t. Iqqn nit ilmma iḍ s tillas nns. Akud ann nit ssntint tiqbucin n iqlqal lli llanin f iggi n udrras ar smrɣant aylliɣ skrnt ɣ iḍ zun d azal. « Vasilisa » tumẓ tt tawda. Tddm ar tettrgigiy. Ifaddn nns ur tt sul usin. Ur sul tzmr mqqar d ad trwl zɣ wansa yan lliɣ tɣama. S tuẓwayt iddm wakal ar ittmdudi. Imikk, ha nn taɣʷẓnt « baba yaga » lli yayln s ufrdu nns. Fad ad tsrbi tifsus, ar tsmdudi askʷm. Af ad tsfḍ tikkal nns tusi tassmt, tbidd ɣ dat n tiflut tg taɣuyyit : (Snif, snif ! aḍu n uksum ilẓan aya mi kṭṭaɣ. Mad ɣid illan ?...) Taẓ nn sis « Vasilisa » s yat tawda iggutn, tzzul fllas, tini as : (tabtti inu, ha nn nkkin ayad. Ha nn istis n tmɣart n baba uzznnt iyi d ad asnt nn awiɣ imik n takat, zɣ tgmmi nnm) (Icwa, icwa, tamɣart n babam tga iyi nit kra. ɣama dari imik n tizi, ha nn riɣ ad iyi tawst ɣ twuri, ukan hati rad ẓrɣ). Itn as « baba yaga ».

Tffi daɣ tɣʷẓnt « baba yaga » yat tɣuyyit zun d iɣ yut iggig, tnna : (isrgln inu dusnin, rẓmat, taggurt inu mqqurn skr iyi ad zriɣ, kmmin). Isrgln rẓmn, taggurt titti nn tskr i « baba yaga » ad tkcm. Tḍfur tt inn « Vasilisa ». Tama nit n taggurt a ɣ tmmɣi yat tgnḍaft lli iran ad tut « Vasilisa » s tfattwin nns. Mac tsawl d tɣʷẓnt tnna as : (uhuy, uhuy, a tagnḍaft inu, ad ur tgrt i « Vasilisa » ha nn nkki ad dids imun.) Iggi n umnar n taggurt, ign ukan gis yan waydi, ɣar iẓra « Vasilisa » yazzl d yiri ad gis ibbi, tnna as « baba yaga » : (uhuy, ad gis ur tbbit a aydi inu, nkki ad dids imunn) Kcmnt ukan s uguns, ha nn yan umucc iẓẓayt « baba yaga » yiri ad ixmj tudemt n « Vasilisa », « baba yaga » tnna as : (amuc inu ad tt ur txmjt ha ti nkkin ad dids imunn.) tgrawl nn taɣʷẓnt s dar « Vasilisa » tnna as : (Is tẓrit ? ! Ha nn ad ur tirit ad trwlt zɣ tgmmi inu, amucc inu rad zun d ixmj tudmt nnm, aydi inu rad km ibbi, tagnḍaft inu rad km tut s tffatwin nns. Taggurt inu rad tqqn ; Ur ad km tajj ad tffaɣt).

Tkcm nn ukan « baba yaga » s uguns n tgmmi, tẓẓl f iggi n yan iflu tsawl d tnna : (Tasmaxwut ! tasmaxwut ! Awi iyi d mad cttaɣ). Tntg tsmaxwut lli tsrs d i « baba yaga » yan ikin n uskkif. Yan waga n ukʷfay, simraw n ufullus, kumraw n ukyyaw, azgn n uzgr, sin iwllay d tammnt, d tmssuyin ggutnin lli naḥya. « baba yaga » tlmẓ akkʷ tiram ann, ur tfki i « Vasilisa » amr yat tilmct n uɣrum. Tsawl d nit tnna as : (« Vasilisa », asi asgrs ann n usngar umlil tffrnt, ha nn iɣ ur tskrt mad zun d nniɣ rad km ccaɣ!). tnna as ukan ɣmkann tẓẓl nit daɣ f iggi n iflu lli tddm ar tsxurruy.

 
Tafruxt nna mu ism Károly Ferenczy

Tusi « Vasilisa » tilmct lli n uɣrum tsrs t inn i taluluct nns tini as : (taluluct inu mẓẓiyn ! Icc tilmct ann tsfldt i tkkrẓi inu. Ha nn « baba yaga » tẓẓuẓi iyi s yat twwuri bahra immran, tskr f wad iyi tcc, iɣ tt ur skirɣ, tsawl d tluluct tnna as : (ad ur tallat, ad ur tɣilft, yuf zun d ad tddut ad tgnt, iḍ rad dids yawi afssay i tmukrist nnm.) Tizi lli ɣ tṭṭas « Vasilisa », tssnti tluluct ar tbbraḥ : (wa timkrarasin ! Wa timalliwin, wa iẓẓakkiwn ; ayllamt d dari. Farriyamt d ad trarmt tagat f « Vasilisa ».) Akud ann nit ad ilkmn yan uhittul n igḍaḍ s tuggt n iskijjitn ddmn akkʷ ar ffrnn asngar amllal. Ar ttlwaḥn imndi s yat, afran s yat. Ur kkin amya, sɣusn asgrs lli ɣ ufran. Tizi ann nit ad ilkm umnay umlil f iggi n wayyis nns umlil s tarikt tumlilt, tbbaqqi d nit tifawt n wass. Ḥra d ukan tnkr « baba yaga » zɣ yiḍs, tɣr nit i « Vasilisa » : (« Vasilisa » is thyyit tawwuri nnm?), trar fllas « Vasilisa » tnna as : (Yyih a tabtti inu, skrɣ tt akkʷ), tfayl « baba yaga » mac ur tzmir ad tini amya. Tigira tsawl d, tini as : (Hayyi rad dduɣ ad siggilɣ mad cttaɣ, asi kmmin asgrs ann yaḍn iktarn s ikikr d taqqayin n iflilu, iqqan d ad ittufran awd ntta, tskrt gis sin igudiyyn, iɣ ur tskrt mayann ha nn rad km ccaɣ). Tffuɣ d « baba yaga » s usarag tsinṣg, ilkm tt id ufrdu nns. Akud ann nit ad daɣ izri wayyis azggʷaɣ s tazzla, tḍfur t id nit tafukt tagwid. Tskus nn « baba yaga » ɣ uguns n ufrdu nns. Fad ad tifsus ar tsmdudi asakwm. Fad ad tsfḍ tikkal nns tusi tassmt. « Vasilisa » tusi yat tilmct n uɣrum tfk tt i tluluct nns tnna as : (taluluct inu, taluluct inu, smullu flla tawst iyyi). Taluluct, tssnti ar tqqar ɣmkad : (wa iɣrdayn n iɣrm, wa iɣrdayn n wurtan, azzlat d, lkmat id ɣil ad). Ur ta tzri mqqar d yat tizi idrusn lliɣ d lkmn iɣrdayn lli ɣ kraygat anaw, skrn tawuri lli ɣmklli tt tra « baba yaga ». Umnid n tadggʷa, tsrs nn tsmaxut tadabut lli ɣ tlla tirmt n « baba yaga », tggawr ar sis tettqql.

Amnay iḍlan izri daɣ ɣ dat n taggurt n tgmmi, iḍfur t id nit iḍ. Tiqabbucin n iqlquln ssntint daɣ ar smrɣant, iḍaggʷn ar tqaccayn. « Baba yaga » tlkm d s uḍar nns axccan. Tɣr i « Vasilisa », tnna as : (« Vasilisa », is tsmdit tawwuri nnm?)

Trar fllas « Vasilisa » : (yyih a tabti inu smdiɣ akkʷ tawwuri inu), tettfayl daɣ bahra taɣʷẓnt . Mac ur tufi mad ttini, tsawl d, tini i « Vasilisa » : (Ddu kmmin ad tgnt, ha nn awd nkki rad dduɣ ad gnɣ). Tzri « Vasilisa » ɣ tɣrdin n inkan tssfld i « baba yaga » lliɣ tnna i tsmaxut : (ssrɣ takat ad bahra tnnucg, ad ukan nkrɣ rad knfɣ « Vasilisa »). Akud ann ilmma ad nit twats « baba yaga » iggi n yan iflu tgn fllas. Tẓẓl nn incurn nns f iggi n yat tskflt tmun zun d kra n waydi n tgmrt. Tssnti ilmma ar tsxurri aylliɣ tjjawn imṭṭawn tkti d daɣ taluluct nns mẓẓiyn. tfk as daɣ yan ilmc n uɣrum tsfld tt iyi ad zun d alsɣ anzgum inu. Ha nn taɣʷẓnt tra ad iyi tknf tcc iyyi. Taluluct lli tmla as daɣ mas tt id iqqan ad tskr fad tnjm ad ur tettwtca.

 
Bu-ayyis azggʷaɣ

Twats « Vasilisa » dar tsmaxut tḍr nn f iḍarrn nns ar tn tssudum tini as : (Smullu flla a tasmaxut, tawst iyi. Ffin aman f ikccuḍn ad ur tsuncgt takat. Ha ti rad zun d fkɣ tansrift inu lli ittuẓḍan ɣ umṭṭalsu. Trar fllas tasmaxut tini as : (Rad zun d awsɣ a « Vasilisaz », ha nn rad jluɣ kigan n tizi iɣ rad ssrɣɣ takat d rad smliliɣ idḍarrn n « baba yaga » fad ad iggz iḍs nns, akud ann rwl kmmi). Vasilisa trur as awal tini as : (Mac hati ksuḍɣ ad iyi amẓn imnayn rarn iyi d s dars.) (Uhuy) itn as tsmaxut : (Amnay umlil hati azal zun d aẓrf ayan, amnay azggʷaɣ ha nn tafukt iznẓrn ayann, amnay asggan ha nn iḍ ijujgn s itran ayann, ur gisn tksuḍt amya) Tuzzl « Vasilisa » s dar taggurt iwats tt id umuc ira ad tt ixʷmj, mac tfka as yat tubbit n uɣrum yajj tt nit tffɣ.

« Vasilisa » tettrmd i iskfal, aydi yuki nn fllas ira ad tt ibbi tluḥ as d awd ntta yat tgzzumt n uɣrum yajj itt ilmma tzri. « Vasilisa » tra ad nn tffuɣ zɣ ɣ usarag, tagnḍaft tsmun iɣawsn nns ad as tsdiqqs alln nns. Mac tafruxt tusi d yan usadad tass as t inn d tifattwin nns tajj tt tzri, tlkm nn ukan « Vasilisa » taggurt tiri ad tqqn, tasi d imik n tadunt tg ttin i wawrz n taggurt tajj itt nit ilmma tzri. Tffuɣ « Vasilisa » zɣ tgmmi tfk i tagant. Tizi ann nit ad izri umnay asggan, taɣul tagant tg akkʷ tillas.

Mamnk rad tskr ad turri s dar tmṭṭut n babas ur nn tiwi takat? Tssn is d tamɣart n babas ur ad tt tajj ɣmkann.

Akud ann tmla daɣ tluluct lli i « Vasilisa » mas d iqqan ad t tskr, tusi « Vasilisa » yan uqlqul zɣ willi ssutlnin i tgmmi. Tskcm gis yat tkurayt tbbi ilmma tagant. Tiqabbucin n uqlqul ar smrɣant aylliɣ yurri yiḍ ig zun d azal.

Ur tkki « baba yaga » amya tnkr d tmmiẓg tɣr i « Vasilisa » mac laḥ as tt. S umnid n taggurt tuzzl. Tsawl s umucc : (Amucc. Amuc inu bu isḥarrayn. Lliɣ fllak tzri « Vasilisa » is tt txʷmjt ?) Amuc irur fllas inna as : (Mraw isggʷasn aya ad darm liɣ tawwuri ur iyi jjun tstcit, mqqar d tubbit n uɣrum ur iyyi t junn tluḥt, « Vasilisa » nttat tfka yyi imik n mad cttaɣ ajjiɣ tt tzri.) Tflt « baba yaga » tazzl s usarag tɣr i waydi : (aydi inu, aydi inu, is ur tbbit ɣ « Vasilisa » lliɣ fllak tzri ?).

Irur fllas waydi inna as : (Max mnnaw isggʷasn aya ad darm liɣ tawwuri ur iyyi jju tfkit mad cttaɣ, nttat tfka iyi imikk n uɣrum ajjiɣ tt tzri.) Akud ann tettfayl « baba yaga » tg yat tɣuyyit isqqaqn tɣr i tgnḍaft tini as : (Lliɣ fllam tzri « Vasilisa » is as d ur tiwwkt alln ? Tagnḍaft tnna as : (Tga i tfattwin inu yan usadad ajjiɣ tt ad tzri. Mac kmmin ur jju tt gigi tiwit. « baba yaga » ur as sul tɣama amr taggurt, tazzl dars tnna as : (Lliɣ tra « Vasilisa » ad tffuɣ is as ur tqqnt aɣaras ? Yak ur tt tujjit ad tffuɣ ?) tnna as taggurt : (Ur tt ujjiɣ aylliɣ zwar tga imik n tadunt i iwrzan inu.) Trfa « baba yaga » aylliɣ tra ad tffuɣ ixf nns, tazzl ar tkkat aydi, ar tettṣlab amuc, tasi d aglzim ad tbbi tagnḍaft, tssfrsi taggurt.

Tṛmi « baba yaga » iẓḍay fllas yixf nns, ur sul tzmr ad tḍfur « Vasilisa ». Tlkm nn « Vasilisa » tigmmi n babas. Ur nn gis tufi mqqar d aḍu n takat. Tamṭṭut n babas d istis uzzln d akkʷ ar d dis tẓẓint ar tt ttrgamnt ar tt ssignni tnt nnant as : (Manid tkkit unck ad, is d tiwit takat ? Han nkʷnti nmmaɣ dis tagwi ad tamẓ, xttali d niwi dar inaragn ur nn tbbi amya, ur tkki amya tns, mad issn ikut tinnm kmmi rad tamẓ?) « Vasilisa » tskcm d s tmṣriyt lliɣ munnnt aqlqul lli d tiwi. ɣar tsrst isgrawl nit tiqabbucin nns s umnid n tmɣart d istis gn iznẓarn nns zun d tamẓla, inna lkmn jdrnt tamɣart d istis, uzzlnt ad rwlnt, tamẓla tḍfar tnt inna s ddant aylliɣ tnt tjdr. Taskkat ann gant zun d tirgin nsanin. « Vasilisa » tusi aqlqul lli tmḍltin ɣ yan wansa, ansa yan, ur fllas izri umya immɣid gis yan ujddig bahra izggʷaɣn.

Zɣ akud ann ur sul tzmr « Vasilisa » ad tɣama ɣ tgmmi lli. Tfl darsn tddu s yan iɣrm, ur tufi amr yat twssart n tmɣarin tili ɣ tgmmi dars. Yan wass tnna « Vasilisa » i twssart lli : (Hati nkki a lala rmiɣ igiwr ! Iqqan d ad iyyid tawit kra n tilmi d idd nns hati ssnɣ i uẓṭṭa)

Tiwi as d twssart aylli tra. Tssnti ilmma « Vasilisa » tawwuri s yat tunfust mqqurn. Tẓḍa ilmma « Vasilisa » yat tfawwut bahra isdidn aylliɣ tẓḍart ad tt tzzrit ɣ tiṭṭ n tassmi. Tsuka « Vasilisa » tafawwut ann i waman taɣul tmllul zun d adfl.

 
Bu-ayyis asggan

Akud ann ad tsawl « Vasilisa » tnna i twssart lli (Ddu, zznzn tafawwut ad tamẓt darm idrimn)

Tẓra ukan twssart lli tafawwut, tdhcr, tsawl d tnna as : (Uhuy, ay illi, zun d tafawwut ad ur tgi tin tmnziwt, ur tgi amr ad gis iskr iwis n ugllid timlsit nns, ras tt awiɣ s tigmmi n ugllid) Tizi lliɣ iẓra iwis n ugllid tafawwut lli izɣʷẓan iẓri nns isawl d inna i twssart lli : (Mnck ad igan atig nns ?) tnna as twssart lli : (Xttad ur tli atig, ur tgi amr tarragt iwiɣ ak ttid) isnummr bahra iwis ugllid tawssart lli, lliɣ rad tddu ifk as tuggt n tarragin lli mi iɣli watig nnsnt.

Lliɣ ran ayt tgmmi n ugllid ad skrn timlsa ɣ tfawwut lli ur izmr mqqar d yan i twwuri yan, iqqan d yan umẓḍaw bahra issn, igan anaẓur. Ur ufin ayt tgmmi n ugllid amr ad azn i twssart. Lliɣ nn tlkm inna as iwis n ugllid : (kmmin lli iẓḍan tafawwut ad ad iẓḍarn ad tt tgnut). Tsawl d twssart tnna i iwis n ugllid : (Ur d nkki ad illmn tafawwut ad, ur d nkki ad tt iẓḍan, « Vasilisa » tafalkayt as tt illmn nttat as tt iẓḍan).

Akud ann ilmma ad as inna iwis n ugllid : (Nttat ilmma ar ad iyyi gis ignu timlsa nu). Tawssart taɣul d s dar « Vasilisa » tals as akkʷ aylli as inna iwis n ugllid. Tiwi « Vasilisa » tafawwut lli tskr gis timlsa ẓilnin, tklu tnt s ifalan n umṭalsu, tsunɣ tnt s tmuzunin.

Tusi twssart timlsa lli tawi tnt s tgmmi n ugllid, tfl « Vasilisa » ar tllm ɣ tama n yan usksl lli icayfn bahra. Akud ann nit ad ilkm urqqas n ugllid inna as : (Iwis n ugllid iɣra yam s tgmmi nns). Tlkmn « Vasilisa » tigmmi n ugllid ur nn fllas ḍirnt walln nns aylliɣ iẓma, idhcr, s ufulki lli tusi, isawl d inna as : (Iɣ illa mad zun d innan rad didm ngirint walln inu han rad dim ngiriɣ nkki, iqqan ad tgt tamṭṭut inu.) Ibbid yamẓ as afus isggawr t inn ɣ tama nns.

Ur izri umya iskr ugllid yat tmɣra imqqurn yiwl gis iwis « Vasilisa tafalkayt ». Lliɣ d yuri babas n « Vasilisa » ɣ umuddu nns tiwi tin illis iddr dis ɣ tgmmi n ugllid. ɣmk lli dars tumẓ « Vasilisa » tawssart lli as yiwsn lliɣ tlla ɣ tmmara. Taluluct nns nttat ur jjun tffuɣ akuḍil nns. Ddu umalu n tumrt d tnuflayt aɣ ddrn , nkkʷni d iwn rad sul ng inbgiwn nnsn.[2]

Isaɣuln ssnfl

  1. Zɣ Wikipedia tafransist : https://fr.wikipedia.org/wiki/Vassilissa-la-tr%C3%A8s-belle
  2. Asit n Mondeberbere: http://www.mondeberbere.com/vasilisa-tafalkayt.html