Wikipidya:Amḥizwr n Wikipidya Lmɣrib

{{{1}}}

Amḥizwr n Wikipidya Lmɣrib

Asgzl f trabbut n ismrasn Wikimidya Lmɣrib

Tumẓ trabbut n ismrasn Wikimidya Lmɣrib akaz nns dar tsqqimt n tmnaḍin taytmatin ɣ 6 Kṭubṛ 2015, ḍaṛat n mad ttrsnt tirsal n trabbut afad ad tsmdya timrslt n Wikimidya ɣ Lmɣrib. Ar tswuri trabbut n ismrasn Wikimidya Lmɣrib afad ad tdru s kigan n imussutn ɣ ufsar d usbuɣlu n tussna d tdlsa tilellit, s usbuɣlu d ussimɣr n isuma d trubba n idlisn d iwaliwn d mad akkʷ izdin s ifaylutn n ulmad, slawann s tutlayin ttyawsawalnin ɣ Lmɣrib. Ar tswuri trabbut ad n ismrasn afad ad taws i isnfarn n Wikimidya izdin s Lmɣrib, tbdd d iwikipidiyn imɣribiyn, tiri ad tg, ɣ mad d yuckan, yan wayyaw ittyakazn dar tmrslt n Wikimidya ɣ Lmɣrib.

Asakud

25 Ibrir - 10 Yunyu 2023

Asgzl f umḥizwr

Tga tsmɣurt n tumayt tamɣribit ɣ Wikipidya yat tsmɣurt nna tsnmala trabbut n ismrasn Wikimidya Lmɣrib, twads asbaɣur d usbuɣlu d usnflul n tumayt ittyaran f Lmɣrib ɣ Wikipidya Taclḥit. Rad iṛẓm uzmmem ɣ umḥizwr zɣ wass n 25 Ibrir 2023 ar 10 Yunyu 2023, i middn akkʷ sawalnin Taclḥit amr willi ttubdarnin ɣ tfadiwin n umḥizwr.

Aɣawas akudan n umḥizwr

Rad ilin kra n wussan n usmuttg i middn da ur issinn ad aran g Wikipidya d wi da yusrn tiwisi ɣ tɣarast n tirra, bac ad afn imdrawn tamrarut f isqsitn nnsn, ku ass n Ssbt zɣ wussan akkʷ n umḥizwr sg 15:00 ar 16:00 n tdggʷat. (Azday n unmuqqar ɣ Google Meet).
Iṛẓm umḥizwr zɣ wass n 25 Ibrir ar 10 Yunyu 2023.
Iḍfaṛ wakud n umḥizwr akud amaḍlan immzdin (UTC).
Rad tkk tizi n ustal kṛaḍ imalassn ḍaṛat n tmddawt n umḥizwar ass n 10 Yunyu 2023 ɣ tsragt 11:59 n yiḍ.

Tifadiwin n tdrawt

Ad iṭṭf umdraw amiḍan nns iẓlin ɣ wikipidya (iɣ ur tssint manik s rad tskrt amiḍan, ẓṛ tasna n twisi).
Ur ar ttuqbalnt tdrawin s wansiwn n upṛuṭukul (IP).
Iẓḍaṛ umdraw ad idru s yan umiḍan ka, iɣ idru s wuggar n yan rad as tddu tdrawt ns.
Ur ar ttḍman tsqqimt n usnmala d tin ustal ad tɣama tumayt n imdrawn ɣ wikipidya, acku tumayt n wikipidya tga tad bdda ittnfaln ar tettbuɣlu.
Ar ttuqbalnt tdrawin nna ittufkan zɣ usakud n uzmmem ar asakud n tmddawt n umḥizwr 10 Yunyu 2023 ɣ tsragt tiss 11:59 n yiḍ.
Middn izdɣn g tmizar ad: Iṛan, Kurya n iẓẓlmḍ, Surya, Lɛiṛaq d Kuba, ur ẓḍaṛn ad asn nn acknt tsmɣurin nnsn acku ur tlli kra n tɣarast igan tulgint n izin n iqqaṛiḍn.
Ku amdraw ur iḍfaṛn tifadiwin ad rad ittyukkas ism nns ɣ tlgamt n imdrawn.

Tifadiwin n imnnitn

Awttas n umḥizwr ad iga t ussmɣr n tumayt tamɣribit g wikipidya s tutlayt taclḥit, s tirra n imnnitn imaynutn nɣ s ussimɣṛ n imnnitn iqburn n wikipidya.
Ku amdraw iẓḍaṛ ad yara imnnitn da f ira ad iswuri g tlgamt n udraw irnu ism nns tama nns fad ad fllas ur swurin middn yaḍnin, macc ur iẓḍaṛ ad yamẓ uggar n 3 imnnitn ɣ 24 n tsragin.
Iqqan d ad tzri tɣzi n umnni 4000 Bayt.
Iqqan d ad izmmem umdraw ur ta yumiẓ imnnitn ɣ tlgamt n udraw.
Iqqan d ad ttyaran imnnitn s yat tutlayt ifulkin ad gis ur ilint tzgalin n tutlayt nɣ tizgalin ɣ unamk.
iqqan d ad yili umnni isaɣuln d warratn n ku anɣmis.
Iqqan d ad ilin imnnitn tigzmin zun d : izwal, talɣatin, aggur, isaɣuln d taggayyin d imsackan d tumayt n umnni.
Ur rad ttyawqqbaln imnnitn ttyaranin dat n 25 ibrir 2023, 11:59 nɣ ḍaṛat n 10 Yunyu 2023 ɣ 11:59 n yiḍ.

Astal d ungraw n usnqqḍ

Tskr tsqqimt n usnmala yat tɣarast n ustal n imnnitn tga zun d mk ad:

10 tnqqaḍ i ku amdraw isnulfan amnni amaynu ilan tifadiwin akkʷ n umnni awikipidi, izri ɣ taɣzi nns 4000 Bayt.
10 tnqqaḍ i ku amdraw isbuɣlan amnni ilan tifadiwin akkʷ n umnni awikipidi, izri g taɣzi nns 4000 Bayt.
Imnnitn ur izrin 4000 Bayṭ g taɣzi ur rad amẓn amya n tnqqaḍ.
10 n tnqqaḍ i ku amdraw irnan 4000 Bayṭ f kra n umnni aqbuṛ, macc tirra nns ad tili anamk.
5 tnqqaḍ i ku amdraw isnulfan amnni ittwasumrn ɣ tlgamt n umḥizwr.
2 tnqqaḍ i ku amdraw irnan 2 isaɣuln i umnni.
2 tnqqaḍ i ku amdraw irnan avidyu nɣ tawlaft i umnni.
2 tnqqaḍ i ku amdraw irnan talɣa i umnni.

Tismɣurin

Ibidd ustay n imrnayn f uṭṭun n tnqqaḍ lli smunn imdrawn ɣ tizi n umḥizwr, d tannayt n tsqqimt n ustal f tirra nnsn. Akud nna d tffɣ tlgamt n imrnayn n umḥizwr, rad nyalkamn igmamn n tsqqimt n usnmala d imrnayn ɣ tasna n umsawal nnsn nɣ ɣ imayl nnsn afad ad asn nn aznn tismɣurin nnsn. Llant kṛaḍt tsmɣurin, ad tnt igan d:

Taskʷflt tamzwarut: Tanfult n tmsɣiwt (amazon) s watig n 200 Ḍulaṛ Amirikani.
Taskʷflt tiss snat: Tanfult n tmsɣiwt (amazon) s watig n 150 Ḍulaṛ Amirikani.
Taskʷflt tiss kṛaḍt: Tanfult n tmsɣiwt (amazon) s watig n 100 Ḍulaṛ Amirikani.

Tasqqimt n usnmala