Talɣa:Aggur:Imaziɣn/Tuddma

Iga yan zɣ igdudn n iẓẓlmḍ n tfriqt, izdɣ ɣ utrim n wasif n nnil d lmɣrib mqqurn, immnzɣ fllas mnid n tmttiwin yaḍnin. Smman as igdudn lli d myadarn ɣ izmaz iqburn mnnaw yisman, zun d Mazis lli asn smman Igrikn d Maksis lli s tn ibdr unmzray Hiruduts, tiguriwin ad s snat rwasnt ɣ ususru nnsnt taguri Maziɣs. Amma inaragn n Imaziɣn Imiṣṛiyn izaykutn (Ifrɛunen) ar asn aqran s yism Micwic. Awa Iṛumiyn ntni ssmrsn mnnaw n ismawn i Yimaziɣn, rad gisn nbdr Inumidn (Tagldit Numidya), Imuriyn, Libu d Birbir zɣ usggʷas wiss 40 ḍaṛt talalit n Ɛisa. Aɛṛabn ula nttni ar aqran i Yimaziɣn s mnnaw n ismawn zun d "almaɣariba", "ahl almaɣrib", nɣ "albarbar" lli usin dar Iṛumiyn ssfrɣn tt. Taguri nna isnyif ugdud a tga tt Imaziɣn amyun nns Amaziɣ, tla anamk n urgaz ilelli, tirrugza, d bab n waddur.