Baba Ɛli
| Baba Ɛli | |
| Tawlaft n usddi n Baba Ɛli | |
|---|---|
| Azwl anṣli : | Baba Ɛli |
| Asufɣ : | Muṣṭafa Acawur |
| Asinaryu : | Ḥmad n Tama |
| Ismdayn : | Zahya Zahiri Lḥusin Barḍwaz |
| Tamssurt n ufars : | Wardavision |
| Tamazirt : |  Lmɣrib
|
| Tutlayt : | Taclḥit |
| Anaw : | Asddi |
| Ufuɣ : | 2021 |
Iga Baba Ɛli (s tifinaɣ: ⴱⴰⴱⴰ ⵄⵍⵉ,s taɛrabt: علي) yan usddi aclḥi, ar zrayn tsddiyin nns ɣ tbadut tamaziɣt zɣ tuddma n wayyur n wuẓum n usggʷas n 2021 kraygat ass dffir tgmgimt.[1] G yan usun amsdrar ɣ llan imuɣlitn fulkinin kigan, ɣ tlla kigan n tzgzut d waman, ɣ yan uḍwaṛ ɣ Ijukak ɣ tsga n Lḥawz dar idrarn n Drn ɣ wul n tmazirt n Iclḥiyn, ibdda umssufɣ Muṣṭafa Acawur f usddi n Baba Ɛli nna mi iskr Ḥmad Ntama asinaryu yurar gis tilalt tadslant. Asddi ad isman yat trabbut n isgbarn sugrnin n ssinima tamaziɣt n tmnaḍt n unẓul zun d Zahya Zahiri, Lḥusin Barḍwaz, Ɛabdllaṭif Ɛaṭif, Faṭima Susi, Nura Lwltiti d wiyyaḍ, aynna t yujjan ad yili yan watig imqqurn ifk as addur dar ugdud. [2]
Amurs ssnfl
Issidt yan umurs war anaw ɣ umezruy n udrama amslmaziɣ s wuṭṭun imqqurn n inḍfarn ya ɣ ttilifizyun tamaziɣt (tv8) ya ɣ tbadut n Warda Vusion ɣ Youtube.
Asddi ad, issnkd tanfust ittwassnn kigan n Ɛli Baba ɣ yan walbuḍ akumidi amaziɣ s tɣarast n isura nna tssufɣ Bubkdi zun d «Ḥdiddan » d «Ṛmmana u Brṭal ». Zɣ mad bdant txrsin nns timzwura, iskr usddi ad yan umsgdal (débat) axatar, aynna yujjan kigan n tbadutin n usnɣms ad fllas sawlnt alliɣ fllas tsawl ula tbadut n utilifizyun Al-Ḥurra.
Kigan n mdden nna ur iẓḍarn ad ḍfrn asddi ɣ utilifizyun, ḍfrn-t ɣ Youtube ɣ tbadut n Warda Vision, ar ilkkm wuṭṭun n imannayn ɣ tbadut ad attayn n uzgn n umlyun i wass, tg txrst tamggarut tamzwarut ɣ Tendance n Umerruk ɣ Youtube aynna igan anẓa imqqurn n wis imurs kigan.[3]
Azaɣan ssnfl
Mqqar takubbrt nɣ d asmurs n umuslsal ad dar ugdud, llan tugt n inaẓurn nna ur issusm mayad d ar ttinin mas yusi ɣ ammas nns kigan d izggaln d tɣawsiwin lli s ixṣṣa nkkni zun d isusiyn ad ig zɣ lmfṛuḍ ad tn nzri ɣilad. Ar ttinin mas d zun d laflam lli n VCD, ur illi ḥtta kran usbuɣlu n uswingm dar id bussinaryu n laflam ad n tclḥiyt zɣ ɣ-akud-ann ar ɣassa, da nẓṛṛa mas ur iẓḍaṛ amssufɣ n lfilm amaziɣ aclḥiy ad iffɣ zɣ tannayt ann n tamazirt d iɣyal d umɣar. Nnamaṭya ad ar tnqqa ufilm aclḥiy d ar bdda tḥṣar tamagit taclḥit ɣ tamazirt n taqrmamact d mayad ur igi f ṣṣaliḥ n ufilm aclḥiy sɣ ɣid s lgddam. Ar ttinin ula mas d taɣarast nna s sawaln imumtilin ɣ ammas n ufilm d lixraj ar isxcn lxir ad, ar nttafa mas ur imkn ad izri kran lmachad bla ad tẓin ayt uḍwar d ingr-atsn sul s wawal ixcnn, d ar kullu tnuccugn tafgga nnsn d udm nndn iɣ ran ad sawln. Tamamkt ad n ttmtil ar tajja yat tawlaft ixcnn f ufgan aclḥiy acku kudnna nssfɣ kran lfilm iqqand ad najj ɣ ixfawn nnɣ mas d lfilm rad iɣumu ula i tarwa nnɣ d warrawn nnɣ d mayad ar asn yakka yat twlaft izgglt f iqburn nnsn.[4]
Aflla n wawal ssnfl
Tawuri ad tga tayafut n kigan n iseggʷasen n uswuri ɣ yigr n ssinima isawaln s taclḥit ɣ tmazirt n Sus nna ibdan ɣ 1991 d umssufɣ Aḥmd Badduj s usaru nns «Tamɣart n wurɣ» nna d-tssufɣ Warda Vision. Tamggarut ad tssufɣ-d wahli n isura yaḍn s tmaziɣt nna ttwassennin ɣ Umrruk s timmad nns zun d «Bu tfunast», «Mukir », «Ḥmmu Unamir », «Ran kullu ddunit», «Tiyti n wuḍan», «Ɣassa ddunit azkka lixrt »...atg.
Isura ad, d wiyyaḍ ẓḍarn ad srsn tasila i ssinima tamaziɣt ɣ temnaḍt n unẓul n Umrruk tɣnu-d yan mnnaw n yitran zun d igllin n «Ḥmad Badduj», «Muḥemmad Abaɛmran », «lburka Lḥusayn», « Mbardk Elɛṭṭac », «Burdwaz », «Ɛaṭif », « F. Bucan»,... atg.
Isul udrama amaziɣ da ittnala kigan n imukrisn nna ur t-ittajjan ad ibuɣlu uggar.
Ẓṛ uggar ssnfl
Isaɣuln ssnfl
- ↑ ( ar ) Agadir24.info - مسلسل “بابا علي” أيقونة أمازيغية تحقق مشاهدات عالية على قناة تامزيغت
- ↑ ( ar ) Assabah.ma - “بابا علي” يتفوق في “تامزيغت”
- ↑ Asddi n Baba Ɛli, tanfust n umurs - yura t Muḥemmed Belarhzali
- ↑ Baba Ɛli, asddi n ṛmḍan lli akk izwarn ɣ uṭṭun n imannayn ɣ tabadut tamaziɣt - Tazerwalt.cf