Idrnan

Anmuggar n Idrnan iga yan unsay azayku g umzruy n idrarn n igizuln, ar sis sfuglunt kigan n tqbilin g waṭlas amẓyan: ɣ iga ida ultit (s tqbilin nns s kṛaḍt: ida ggʷarsmukt, ida usmlal d ida ubɛqqil), Tafrawt, Ayt Ṣwab, Isagn, Ida Ugnidif... atg. Ar ittili unmuggar f tɣzi n kṛaḍ n wayyurn imzwura g usggʷas amaziɣ (innayr, bṛayṛ d maṛṣ), ar ittkka kṛaḍ n wussan g ku usun (akwas, asimwas d uṣiḍyas).

ⴰⵏⵎⵓⴳⴳⴰⵔ ⵏ ⵉⴷⵔⵏⴰⵏ ⴳ ⵜⵉⵏⵎⵍ ⵜⴰⴳⵔⴰⵡⴰⵏⵜ ⵏ ⵜⵖⵎⵉ, ⵜⴰⵙⴳⴰ ⵏ ⵜⵣⵏⵉⵜ.

Assaɣ n unmuggar

Anmuggar ad ila ism n idrnan, taguri ad tga asugt, asuf nns: «adrni, tadrnint, tidrnit niɣ adrnu». ikka d wassaɣ ad yan wanaw n uɣrum niɣ imaḍaṛn ar ittili usnwi nnsn ɣ tmlda ad. s uyad, idrnan gan yan umaḍaṛ skarn middn zɣ uggrn n tmẓin, ar gis skarn arktu, ssnwun t ɣ uzatim n uzmmur niɣ win wargan.

Aẓaṛ n unmuggar

Anmuggar ad ar t ttrarnt kra n tḍṛiṣin timiwanin s ugrram Sidi Buyḥya Ggu Ugrsif, rarn t wiyyaḍ i Sidi Muḥmmad Aɛjli f is d nttni ad d isggʷran anmuggar ad afad ad yamu ufra, ibbi umlasay d yimnɣi gr twsatin... yili ma ad t irurn is ila azdduy d tfugliwin n yiḍ n yinnayr.

Maca, iqqan d ad nsskn is d ansay ad yut bahra s iẓuṛan g umzruy alliɣ immra ad ittyakz uẓaṛ nns amzwaru... iɣ nssn is iga udɣar ad ansa g tt nn kkant mnnawt n tbridin tisgdanin zɣ tga tggudya, tiggurma... ayad iẓḍaṛ ad ifl iḍiṣ nns f unsay ad, ig t d wayda amazar.

Acku ar nttafa g insayn n wudayn yat tfugla mi ttinin "ḥanuka" tafugla n tifawin ittkkan tam n wussan g ttilint tiram yurfn g uzatim s tugt zun d idrnan s wanawn nnsn... ig darsn ula nttni tafugla n tumrt d usfuglu.

Timyurin d tiram n usfuglu

Anmuggar ad ittwassn gr tmizar s tmyurin nns bahra fulkinin, ɣ ttilint tɣrsiwin n izgarn d izammarn; tettwabḍu gis tfyyi f tgʷmma d tawjiwin; ilint gis trzzaf, ar ttddun middn dar wiyyaḍ; ar ttmunn ayt tmazirt ar sawaln f unzgum nnsn, afin ifssayn i tmukrisin nnsn, s tumrt d ufra. anmuggar ad iga ula tamlda ɣ ittili uẓawan s tugt d uḥwac s wanawn nns.

Ar skarn middn kigan n wanawn n tiram s tmlda ad ɣ gan idrnan igan tirmt tadslant n usfuglu; ilint tmkilin n wudi d tammnt d umlu niɣ azatim n wargan; ar ssnwan middn mnnaw wanawn n uɣrum zun d aɣrum n inkan, win tfllunt, win tfarnut... amk ssnwan ɣ yimnsi tasmtut niɣ taṭṭajint n wayll s trkmin… ilint tiram n watay d taqqayin d ssrusn middn i inrzaf nnsn ɣ unmuggar ad.

Anmuggar yutn s iẓuṛan ɣ umzruy amaziɣ, gn yat tmlda ɣ ssitimn middn ad iɣudu usggʷas, ilin s wannaz ifulkin. ar ttinin middn i wazzann mẓẓiynin: «wanna iccan tidrnint izwarn, ar ittafa tiglay n tskkurt.», inin ayt Ida Ubɛqqil.